Bakı şəhərində ictimai nəqliyyatda innovativ yenilik tətbiq olunur. İlk dəfə olaraq şəhər avtobuslarında NFC texnologiyasını dəstəkləyən yerli bank kartları, eləcə də "Apple Pay" və "Google Pay" vasitəsilə nağdsız ödəniş sisteminə start verilib.
Pilot layihə ilkin mərhələdə 500 nömrəli marşrut xəttində — metronun “20 Yanvar” stansiyasından Sumqayıta qədər — tətbiq olunur. Sınaq müddəti 1-3 gün arasında davam edəcək və nəticələrə əsasən sistemin bütün marşrutlara yayılması nəzərdə tutulur.
Yeni sistem sərnişinlər üçün rahatlıq yaradır. Artıq nağd pul və ya fiziki “BakıKart” daşımağa ehtiyac yoxdur. Telefon, ağıllı saat, bank kartı və ya digər NFC funksiyalı cihazı validatora yaxınlaşdırmaqla saniyələr içində ödənişi həyata keçirmək mümkündür.
Qeyd edək ki, bu ödəniş mexanizmi “MasterCard” və “Visa” kartları ilə Gəncə, Şamaxı və digər şəhərlərdə də artıq tətbiq olunur.
Dərc edildi:
22.12.2025
