Azərbaycanda məhkəməyədək icraatın elektron qaydada aparılması nəzərdə tutulur. Bu məsələ Milli Məclisin Hüquq siyasəti və dövlət quruculuğu komitəsinin iclasında müzakirəyə çıxarılan Cinayət-Prosessual Məcəlləsinə təklif edilən dəyişiklik layihəsində öz əksini tapıb.
Layihəyə əsasən, məhkəməyədək icraat cinayət təqibi orqanlarının informasiya sistemləri üzərindən həyata keçiriləcək. Prosessual sənədlər və digər məlumatlar elektron formada hazırlanacaq və mübadilə olunacaq.
Eyni zamanda, istintaq prosesinin iştirakçıları üçün xüsusi elektron kabinet yaradılacaq. Bu kabinet vasitəsilə işin gedişi, qəbul edilən qərarlar, icra vəziyyəti, şikayət və protestlər barədə məlumat almaq, sənədləri göndərmək və qəbul etmək mümkün olacaq.
Əgər proses elektron qaydada aparılarsa və iştirakçılar sistemdə qeydiyyatdan keçmiş olarsa, prosessual sənədlər onların elektron kabinetinə yerləşdiriləcək. Bu barədə vətəndaşlara SMS və ya e-poçt vasitəsilə bildiriş göndəriləcək. Sənəd elektron kabinetə yerləşdirildiyi və bildiriş təqdim edildiyi andan rəsmi təqdim olunmuş hesab ediləcək.
Dərc edildi:
03.02.2026
