Əvvəllər Moltbot və Clawdbot kimi tanınan viral virtual assistent OpenClaw internetdə baş verən daha geniş bir inqilabın simvoluna çevrilib. Bu dəyişiklik internetin necə işlədiyini kökündən dəyişə bilər. İnsanların üstünlük təşkil etdiyi mühit əvəzinə, yaxın gələcəkdə internetə avtonom süni intellekt botları hakim ola bilər.
Vebdə bot fəaliyyətini ölçən yeni hesabat və internet infrastruktur şirkəti Akamai-nin WIRED ilə paylaşdığı məlumatlara görə, süni intellekt botları artıq internet trafikin əhəmiyyətli hissəsini təşkil edir. Eyni zamanda, saytların müdafiə sistemlərini aşmaq üçün botların daha mürəkkəb üsullardan istifadə etdiyi də qeyd olunur.
TollBit şirkətinin həmtəsisçisi və CEO-su Toşit Panqrahinin sözlərinə görə, gələcəkdə internet trafikin böyük hissəsi botlardan ibarət olacaq. Bu artıq təkcə müəllif hüquqları problemi deyil, internetdə yeni bir “istifadəçi” növünün yaranması deməkdir.
Böyük saytların əksəriyyəti süni intellekt sistemlərinin təlimi üçün məzmunun avtomatik toplanmasını məhdudlaşdırmağa çalışır. Bir çox media qurumları süni intellekt şirkətlərini müəllif hüquqlarının pozulmasına görə məhkəməyə verib.
Eyni zamanda, real vaxt məlumatı toplayan yeni nəsil AI botların sayı da artır. Çatbotlar artıq internetdən aktual məhsul qiymətləri, kinoteatr cədvəlləri və son xəbərlər kimi məlumatları götürərək cavablarını daha dəqiq və aktual edir.
Akamai-nin məlumatına görə, ötən ilin iyul ayından etibarən süni intellekt təlimi ilə bağlı bot trafiki davamlı şəkildə artır. Qlobal miqyasda AI agentləri üçün veb məzmun toplayan botların fəaliyyəti də yüksələn xətt üzrə davam edir.
Dərc edildi:
05.02.2026
